GENSAN – Mainiton nga gidawat ni Mayor Lorelie G. Pacquiao, kagahapong adlawa sa buhatan niini ang mga atletang Heneral nga miapil ug nagrepresentar sa nasud sa SEA Games 2025 nga gihimo sa Thailand, isip pagpasidungog ug personal nga pagpasalamat sa ilang katakos, sakripisyo, ug dedikasyon sa sports.
Lakip sa maong mga atleta silang Kristine Kate Mercado, Lorenzo Pontino, ug Felix Pontino Jr. sa Philippine Team sa Jet Ski, Josh Ybañez sa Men’s Volleyball, ug Marc Kian Jake Fuentes ug Jimboy Carmona Loquinario sa Sepak Takraw.
Gidayeg sa mayor ang tagsa-tagsa nga kalampusan nga nagpamatuod sa taas nga lebel sa disiplina, determinasyon, ug kamaayo sa mga atleta sa General Santos City, nga nagdala og dungog sa Pilipinas ug sa dakbayan ug nagpadayon sa pagpalig-on sa reputasyon niini isip “Home of the Champions”.
