Walay espesyal nga arrangement nga ihatag kang Davao City Mayor Sebastian “Baste” Duterte sa iyang pag-atubang isip testigo sa impeachment trial sa iyang igsoon nga si Vice President Sara Duterte, sumala sa Senate Impeachment Court.
Matud ni impeachment court spokesperson Atty. Reginald Tongol, mahimong gamiton ni Baste ang holding room nga gitagana alang sa vice president kung gusto niya, samtang mahimo usab siyang magpabilin sa naandan nga lugar diin naghulat ang mga testigo sa ilang pagpatawag sulod sa Senado.
Sumala kang Tongol, bahin lamang kini sa naandan nga proseso sa impeachment proceedings ug dili espesyal nga pribilehiyo alang sa Mayor.
Gimandoan sa impeachment court si Mayor Duterte nga moatubang isip prosecution witness sa Setyembre 28 o 29. Gilauman nga pangutan-on siya bahin sa mga transaksyon tali sa Davao City government ug GenCorp Industries, usa ka kompanya nga gideklarar ni VP Sara nga business interest niini sa iyang Statements of Assets, Liabilities and Net Worth o SALN.
Gimandoan usab ang Mayor nga magdala sa mga opisyal nga rekord ug kontrata gikan 2020 hangtod karon nga may kalabotan sa mga transaksyon sa City Hall ngadto sa GenCorp ug sa bisan unsang entidad nga nanag-iya o nagpadagan og mga branch sa Jollibee.
Nahimong bahin sa impeachment complaints batok sa vice president ang GenCorp human gideklarar ni Sara ang iyang interes sa maong kompanya sa iyang SALN.
Si Mayor Duterte apil sa mga testigo nga gitumbok sa House prosecution panel kalabot sa mga alegasyon ubos sa Article II sa impeachment complaint.
