Sulod na sa finals sa Britain’s Got Talent Season 19 ang Filipino singer nga si Matty Juniosa human nakadawat siya og ikaduhang Golden Buzzer gikan sa usa ka judge sa kompetisyon.
Sa semifinal round, gipabilib ni Matty ang mga nanan-aw ug ang mga judges pinaagi sa iyang kusgan nga pag-awit sa kantang “Dream On” sa Aerosmith.
Tungod sa iyang performance, mitindog ug naghatag og standing ovation ang upat ka judges nga sila Simon Cowell, Amanda Holden, Alesha Dixon, ug KSI, apil usab ang live audience.
Gidayeg ni Alesha ang Pinoy singer, ug gihulagway ang performance niini nga “effortlessly sensational” ug usa ka “masterclass” sa pagkanta.
Sa katapusan, si Amanda ang mipindot sa Golden Buzzer, nga naghatag kang Matty og diretso nga tiket paingon sa finals.
Matod pa, nakadawat na kaniadto og Golden Buzzer si Matty gikan kang Simon sa iyang audition, nga maoy nagdala kaniya sa semifinals.
Sa karon, nagpuyo si Matty sa Glasgow, Scotland, diin nagtrabaho siya isip part-time waiter samtang aktibo usab siya sa pag-perform sa teatro.
