GENERAL SANTOS CITY – Gapanawagan si Kagawad Jeng Gacal ngadto kang Atty Arnel Zapatos, City Administrator, nga i-implementar na ang amended Anti-Smoking Ordinance.
Kini human nakadawat ug taho nga daghan ang nakamatikod nga nahimong ningas-cogon sa pagpatuman sa naasoy’ng balaod, ug daghan gihapon ang gapanigarilyo sa mga pampublikong lugar dinhi sa dakbayan.
Gikabutyag nga gawas sa local ordinance, aduna usay national law apan wala gihapon natuman.
Kahibaluan nga base sa gi-amyendahan nga ordinansa, wala nay first offense ug second offense, inay gilayong pamultahon ug P2,500 ang mga madakpan nga nanigarilyo sa pampublikong lugar sa siyudad, samtang alang sa mga establisyimento, P5,000 ang first offence, ug sa ikaduhang pagsupak, kanselasyon na sa business permit.
