GENERAL SANTOS CITY – Padayong miani ug pagdayeg sa mga netizens ang usa ka tricycle driver dinhi sa siyudad human giuli sa usa ka estudyante ang laptop nga nabilin niini sa iyang unit.
Kini human nag-viral ang post ni Reymart Juntado Canja kung asa gipasalamatan niini ang driver nga giilang si Rembson Bacadon, taga-GenSan, human nauli ang iyang laptop.
Nasayran nga nabilin niya ang laptop sa tricycle ni Bacadon kaniadtong Marso 4, hinungdan nga wala nakatulog pagkagabii ug grabe ang gihimong pag-ampo nga mauli pa ang maong butang.
Sumala pa nga unod sa maong laptop ang iyang mga mahinundanong files.
Mi-contact matud pa kaniya si Bacadon pinaagi sa social media, ug gibutyag nga anaa kaniya ang laptop ug nakigsabot nga magkita sila.
Pagkasunod adlaw nagkita sila ug nauli kaniya ang laptop.
Kahibaluan nga sagad negatibo ang madunggan nga komento sa mga tricycle driver sa siyudad gumikan sa pagka-pilian ug pasahero, mahal maningil, ug walay disiplina.
Hinungdan nga daghan ang nanghinaot hilabi na ang mga commuters nga mudaghan pa ang mga tricycle driver nga susama kang Bacadon.
