GENERAL SANTOS CITY – Giklaro sa Securities and Exchange Commission kon SEC nganong angayan nang pasirad-an ang KAPA.
Sa gipahigayong press conference sa pagpanguna ni SEC Chairman Emilio Aquino, gibutyag niini nga kon pasagdan ang susamang investment scheme nga magpadayon, mas daghan pa ang mga mabiktima, hilabi na ang mga OFWs.
Mahimo usab matud pang maawhag ang uban pang mga grupo ug religious groups nga magtukod ug susamang scheme nga matud pa dili gayud kayang makasustiner hangtod sa hangtod sa hilabihan ka dako nga gisaad nga interes.
Mao matud pa kini ang rason nganong makapila ka higayon silang nagpagawas ug mga advisories, cease and desist order ug revocation sa registration batok sa KAPA.
Dungan niini, subling gihingusgan sa SEC nga walay bisan unsang korte gawas sa Court of Appeals ang mamahimong maka-isyu ug restraining order o kaha preliminary mandatory injunction batok sa komisyon, base sa Section 179 sa Revised Corporation Code of the Philippines.
Kini human sa nahimong depensa sa founder sa KAPA nga si Joel Apolinario kaniadtong Sabado kalabot sa TRO ug preliminary mandatory injunction nga gipasang-at nila batok sa komisyon, dungan sa pagpasalig sa mga miyembro sa KAPA nga dili sila mapasirad-an.
Sa karon gimando na usab sa Court of Appeals (CA) nga i-freeze ang pipila ka banks accounts og uban pang assets sa KAPA nga gidumalahan ni Joel Apolinario.
Nasayran nga wala na naabtan sa mga otoridad si Apolinario nga gikanayong anaa sa Cebu karon dihang gisulod sa mga sakop sa National Bureau of Investigation (NBI) ang balay niini sa Brgy. City Heights ning dakbayan kagahapon.
Kini dungan sa gipahigayong synchronized raid sa ahensya sa mga KAPA offices sa pipila ka parte sa nasud base sa search warrant nga gipagawas ni Manila Regional Trial Court (RTC) Branch 20 Judge Marivic Umali batok sa naasoyng investment scam.
Kalabutan kini sa matud pa paglapas sa KAPA sa Securities Regulation Code.
