Giprisinta sa House prosecution panel atol sa pagdungog sa giingong sayop nga paggamit sa confidential funds ni Bise Presidente Sara Duterte ang usa ka acknowledgment receipt gikan sa Office of the Vice President nga gisumite sa Commission on Audit.
Nakasulat sa maong resibo nga ang kontrobersyal nga ngalan nga “Mary Grace Piatos” nakadawat og P70,000 isip “payment of reward (medicines).”
Matud sa testigo sa prosekusyon nga si kanhi COA Intelligence and Confidential Funds Audit Office (ICFAO) state auditor Roderick Wamil, ang maong acknowledgment receipt dili igo ug kulang sa mga supporting documents.
Gipadayag niya nga posible kining nakalapas sa Joint Circular 2015-01 tungod kay walay kaubang dokumento nga nagpamatuod sa kalampusan sa operasyon o transaksyon, nga maoy gikinahanglang rekisito sa pagpagawas og payment of rewards gamit ang confidential funds.
Gipangutana usab ni House prosecution counsel Atty. Lorna Kapunan ang testigo kung ang giingong reward ba mao ang tambal. Mitubag ang testigo nga dili kini matino pinaagi lamang sa resibo nga ilang gihuptan, mao nga nangayo ang COA og dugang nga pasabot ug mga dokumento.
Matud pa, dugay nang gikuwestiyon sa mga magbabalaod sa House of Representatives ang ngalan nga Mary Grace Piatos tungod kay susama kini sa pinagsamang ngalan sa usa ka iladong chichirya ug restawran.
Gikumpirma usab kaniadto sa Philippine Statistics Authority (PSA) nga walay opisyal nga rekord sa pagkatawo, kaminyoon o kamatayon sa pangalang “Mary Grace Piattos” sa tibuok nasod. Tungod niini, nagtuo ang prosekusyon nga posible kining peke nga identidad nga gigamit aron matabonan ang paggasto sa confidential funds.
