Naputol ang winning streak ni kanhi WBC Featherweight Champion Mark “Magnifico” Magsayo human siya mapildi ni Andres Cortes pinaagi sa ‘unanimous decision’ ning Sabado sa T-Mobile Arena.
Pareho nga 97-93 ang puntos nga gihatag sa tulo ka judges pabor kang Cortes, human niya makontrol ang dakong bahin sa ilang 10-round lightweight nga panagsangka.
Napugngan ni Cortes ang kusog ug paspas nga kombinasyon ni Magsayo pinaagi sa agresibong pagpakigbugno sa close range.
Imbes hatagan og distansya si Magsayo, padayon nga gipaduol ni Cortes ang away ug epektibong gigamit ang iyang right hand gikan sa nagkalain-laing anggulo.
Nakabawi gamay si Magsayo sa katapusang tulo ka rounds human masamdan si Cortes, apan dili na kini igo aron mausab ang resulta sa away.
Tungod sa kapildihan, nahulog sa 29-3 ang record ni Magsayo, lakip ang 19 ka knockouts, samtang nagpabiling walay pildi si Cortes sa 26-0 nga record ug 13 ka knockouts.
Kabahin ang maong panagsangka sa Zuffa Boxing event ug usa unta kini ka dakong higayon alang kang Magsayo aron mapalig-on pag-usab ang iyang posisyon sa lightweight division ug makaduol pagbalik sa world title contention.
