Gipasabot ni Pangulong Ferdinand “Bongbong” Marcos Jr. ang rason nganong adunay pipila ka isyu nga wala naapil sa iyang ikalimang State of the Nation Address (SONA) niadtong Hulyo 27.
Sa vlog nga gipost sa official Facebook page sa Presidente karong Sabado, Agosto 8, iyang gipaambit ang mga istorya sa luyo sa iyang SONA. Matud sa Pangulo, gikinahanglan niyang putlon o tangtangon ang ubang mga topiko aron dili mahimong sobra kataas ang iyang pakigpulong.
Bisan pa niini, gipasabot sa Pangulo nga ang wala paghisgot sa pipila ka isyu wala magpasabot nga dili kini importante. Matud niya, atangan na lamang sa 2027 ang mga isyung wala niya naapil karong tuiga.
Giangkon usab sa Pangulo nga adunay mga last-minute changes samtang siya nagpahayag sa iyang pakigpulong aron mas mahimong klaro ug diretso ang iyang mensahe.
Nahinumdoman nga milungtad og usa ka oras ug 25 minutos ang ikalimang SONA ni Pangulong Marcos, busa gitapyasan ang ubang mga isyu tungod sa konsiderasyon sa oras.
Lakip sa mga topikong wala kaayo nadetalye o wala gyud naapil sa iyang pakigpulong mao ang balaod alang sa kinatibuk-ang pagsaka sa suweldo sa mga trabahante sa nasud.
Wala usab naapil ang Anti-Political Dynasty Bill sa priority measures bisan pa nga napasar na kini sa House of Representatives.
Wala usab hisguti sa maong SONA ang mga isyu kalabot sa human rights ug ang kontrobersiya nga may kalabotan sa International Criminal Court o ICC.
