Abli si Pangulong Ferdinand Marcos Jr. sa mga sugyot nga paghugot sa paggamit sa social media sa mga menor de edad aron maprotektahan sila batok sa mga peligro sama sa cyberbullying ug mga isyu nga may kalabotan sa pangisip.
Kini ang gipadayag ni Claire Castro sa dihang gipangutana kon nakita ba sa administrasyon ang panginahanglan nga repasohon ang access sa mga bata sa social media, sama sa hugot nga mga polisiya nga gipatuman sa Australia, France ug United Kingdom.
Matud pa ni Castro, nahisgutan na usab sa gobyerno ang epekto sa sobra nga paggamit sa pipila ka online applications sa mga kabatan-onan, ilabina ang pagka-adik sa mga violente nga online games.
Dugang niya, maayong sugyot ang paghimo og balaod nga magbutang og mas estriktong regulasyon sa paggamit sa social media ug uban pang online platforms sa mga bata aron mapanalipdan sila gikan sa posibleng makadaot nga sulod ug impluwensya sa internet.
Naglaom usab ang opisyal nga makahimo dayon ang Kongreso og angay nga balaod aron matubag ang maong isyu ug masiguro ang kaayohan ug kaluwasan sa mga kabatan-onan sa digital nga panahon.
