Nanawagan si Philippine National Police (PNP) chief Police General Rommel Marbil sa nauna nga mga PNP chief nga klaruhon na sa publiko ang ilang kalambigitan sa kontrobersyal nga drug war ni kanhi President Rodrigo Duterte.
Gihimo ni Marbil ang mga panawagan human ang mga rebelasyon ni Retired Police Colonel Royina Garma sa Kamara lakip na ang payment og rewards system sa pagpatay sa mga drug suspects.
Sumala kang Marbil, seryoso nila nga ginatun-an kini nga mga alegasyon og gina-imbestigaran usab ang mga giyagyag nga pahayag ni Garma aron nga masiguro ang accountability og transparency.
“We take these allegations very seriously. We will thoroughly investigate Garma’s claims to ensure accountability and transparency within our ranks,” kabahin sa iyang statement.
Gibutyag usab niini nga nagapreparar na ang kapulisan nga imbestigahanb ang mga alegasyon nga nagalambigit usab sa mga kanhi PNP chiefs.
“Our commitment to human rights and accountability is paramount. We must work diligently to regain the trust of the people and ensure that law enforcement operates within the bounds of the law.”
Sa iyang affidavit, gilambigit usab ni Garma silang Senator Christopher “Bong” Go og kanhi National Police Commission Commissioner Edilberto Leonardo sa implementasyon sa drug war.
Mitubag na si Go kabahin niini og gibutyag nga walay mga ebidensya ang claims ni Garma og gipanghimakak ang giingong rewards system.
Gilimod usab ni Sen. Go nga siya ang naggunit sa kuwarta alang sa maong reward system.
Kahibaluan nga base sa government record, 6,200 ka drug suspects ang napatay sa mga operasyon sa pulis gikan niadtong Enero 2016 hangtod Nobyembre 2023 apan sumala usab sa human rights groups, kapin sa 30,000 ang tinuod nga numero tungod adunay mga wala nareport nga mga kaso sa pagpamatay.
