GENERAL SANTOS CITY – Nagpasalamat si Sen. Manny Pacquiao sa tanang nag-ampo og misuporta kaniya sa iyang away sa Malaysia.
Sa presscon kagabie sa Veranza mall, gibutyag niini nga dili lang alang sa iyang pamilya apan dungog alang sa tanang Pilipino ang iyang kadaugan batuk kang Lucas Matthysse.
Gikadugang sa Peoples champ nga hilabihan ang iyang kalipay sa maayong resulta sa engkwentro nga bunga matud pa sa iyang pagpaningkamot ilabina ang Team Pacquiao gipangunahan ni Coach Buboy Fernandez.
Kini luyo nga may mga pagduda sa iyang katakos isip boksingero tungod sa iyang edad. Nagpasalamat usab si Pacman sa mga tawong nagtrabaho alang sa MP Promotions ug sa Ginoo.
Giangkon usab ni Pacquiao nga mapasalamaton siya sa pagsuporta kaniya ni Pangulong Rodrigo Duterte og Malaysian Prime Minister Mahathir Mohamad human nga personal nga misaksi sa iyang away niadtong Dominggo.
Matud pa niini, labing una sa boxing history nga duha ka pangulo sa lain laing nasud ang mitan-aw sa iyang engkwentro.
Giangkon nga una pa ang ilang away ni Mattysse, excited na kaayo siya nga mapakita ang iyang ‘best’ sa ibabaw sa ring para malingaw usab ang crowd sa Axiata Arena.
Sa pahayag niini, nalipay siya nga daghang miadto ug mitan-aw nga mga pilipino sa away sa Malaysia,
Sa pangutana kung kinsa ang gustong sunod nga makalaban, gibutyag ni Pacman nga wala pa nila maistoryahan ang maong hisgutanan tungod karon gusto una nilang i-enjoy ang ilang kadaugan.
Hinuon, posibleng 2 hangtud 3 ka semana ang makalabay may development na luyo nga pagkakaron giangkon nga daghan na ang nagpadayag nga gustong makigsangka kaniya apan wala pay nahitabong mga negosasyon.
Sa tan-aw ni Manny mga 2 o 3 na lang ka away ang himuon tungod nagka-edad na usab siya.
Gusto sa senator nga MP Promotions gihapon ang magdala sa iyang sunod nga away ug plano niya nga dinhi sa Pilipinas himuon.
Giangkon usab ni Pacquiao nga bug-at og kusog gayud ang mga kinumo ni Matthysse.
Sa unang round pa lamang sa ilang away, mabati na niini ang kakusog sa mga sumbag sa Argentine boxer apan makaya ra niya.
Sa 1st round gitantiya pa niya ang estilo ni Matthysse og sa 2nd round nadakpan na nila kung unsa patumbahan ang nasampit.
Wala siya nagkumpiyansa bisan napatumba niini sa 3 round ang kalaban basin masingitan og saag nga sumbag ni Matthysse.
Sama sa nahitabo dihang na-low blow siya sa nasampit kung asa wala gatan-aw kung asa gasumbag.
Gikadugang pa ni Pacman nga dili makaya nga i-handle ni Matthysse ang kakusog sa kinumo niya hinungdan nga mahadlok nga mudasdas og grabe ang gihimong depensa aron dili maigo sa iyang mga kinumo.
Gibutyag ni Pacquiao nga ‘perfect’ matud pa ang strategy ug gihimong training sa pagpanguna ni Coach Buboy kung asa dako ang sakripisyo sa training. .
