Nagpahibalo ang Manibela nga maglunsad kini og tulo ka adlaw nga transport strike sugod Lunes, Agosto 10 hangtod Agosto 12 kung dili maaprubahan ang ilang gihangyo nga provisional fare increase.
Matud ni Manibela chairperson nga si Mar Valbuena, nangayo sila og temporaryong P2 nga dugang sa minimum nga pasahe samtang ginalantaw pa sa mga otoridad ang ilang petisyon.
Gipasabot ni Valbuena nga padayon nga naglisod ang mga drayber ug operator sa jeep tungod sa pagsaka sa presyo sa produktong petrolyo. Matud pa niya, ang P2 nga dugang pasahe makahatag og dugang nga kita nga mokabat sa P200 kada adlaw alang sa mga drayber nga adunay taas nga ruta, bisan og dili pa kini igo aron matabonan ang tanan nilang gasto.
Sa miaging pahayag, ang Land Transportation Franchising and Regulatory Board mipadayag nga irekomenda niini sa Department of Transportation ang interim fare increase ug posible usab nga diskwento sa produktong petrolyo alang sa mga drayber ug operator sa pampublikong transportasyon.
Samtang nagpaabot sa desisyon sa gobyerno, nangayo usab og pagsabot ang Manibela sa mga pasahero, ug giingong ang tigil-pasada maoy ilang katapusang kapilian tungod sa padayon nga pagsaka sa presyo sa lana nga nakaapekto sa panginabuhi sa daghang mga drayber sa jeep.
