GENERAL SANTOS CITY – Diha diha gilayong namatay ang usa lalake human nga gipusil sa motorcycle riding criminals pasado alas 7:00 ang takna kagabie sulod sa iyang tricycle gawas lang mismo sa ilang panimalay.
Giila ang biktima nga si Roland Dela Cerna, 67 anyos, manghihilot ug residente sa Prk. Relatives Brgy Tambler ning syudad.
Sa pagsaysay sa asawa sa biktima nga samtang anaa kini sa sulod sa ilang panimalay nakadungog kini ug duha ka buto sa pusil.
Paggawas sa balay misinggit na ang usa niya ka anak nga gipusil ang amahan niini. Nakita niini nga naligo na sa kaugalingong dugo ang bana.
Sa imbestigasyon sa kapulisan nga duha matud pa ka lalake nga sakay sa usa ka motorsiklo nga walay plaka ang kalit mihunong tungod sa tricycle dayun pusil sa usa ka higayon ang maong edarang biktima sa iyang kilid nga bahin, sa dihang natumba na ang maong biktima sulod sa tricycle minaug pa ang backrider ug gipusil pa siya sa iyang ulo nga bahin.
Human sa maong insidente gilayong misibat ang mga suspek paingon sa direksyun sa Centro Uhaw brgy. Fatima.
Sa kasamtangan blanko pa ang pamilya sa motibo sa pagpamusil sa biktima..
