Gimando karong adlawa sa Department of Transportation (DOTr) nga mupailawom ang tanang Public Utility Vehicle (PUV) drivers sa ‘mandatory drug testing’. Kini human sa mga insidente sa dalan nga nalambigit ang mga public transportation drivers.
Sa nahimong presscon karong adlawa, sumala ni Department of Transportation (DOTr) Secretary Vince Dizon, himuon nilang regular ang mandatory drug testing ug dili lamang kung mukuha ug lisensya o bisan magrenew ug lisensya.
Suhestiyon pa ni DOTr Sec. Dizon nga himuo kini matag 90 ka adlaw para mas masuta pa gayud ang mga drivers.
Sa iyang pamahayag, makatabang nila sa pag-implementar niini ang Philippine Drug Enforcement Agency (PDEA).
Samtang, planong implementar usab sa ahensya kauban ang Land Transportation Franchising and Regulatory Board (LTFRB) ug Land Transportation Office (LTO) ang pagbawas sa maximum driving hours sa mga depasaheruan nga bus.
Gikan sa unom ka oras kini mamahimong upat ka oras na. Buot pasabot, kung ang byahe ang molampas na ug upat ka oras, angayang may ka-relibo na ang driver.
