Opisyal na nga giproklamar niadtong Sabado, Mayo 17, ang mga Senador nga midaog sa May 12 national and local elections.
Ang Commission on Elections (Comelec) maoy nangulo sa proklamasyon sa 12 ka mga Senador apan wala si Senador Kiko Pangilinan tungod sa pagtambong sa graduation sa iyang anak didto sa Estados Unidos.
Atol sa seremonyas, ang matag Senador gihatagan og higayon sa paghatag og pipila ka minuto nga mensahe.
Samtang, gidayeg usab ni Comelec Chairman George Erwin Garcia ang maayong turnout sa nahisgutang piniliay nga matod niini nga ang turnout nga niabot og kapin sa 82% makonsiderar nga labing dako nga turnout sa kasaysayan sa nasud.
Gipasalamatan usab ni Garcia ang mga batan-ong botante sa ilang partisipasyon ug aktibong partisipasyon sa piniliay.
Gitataw sa Comelec chair nga ang gipakitang suporta sa kabatan-onan ilabi na ang dako nilang porsiyento maoy dakong hinungdan sa pagdiktar kon kinsay sunod nga mga lider sa nasod.
Gipasalig usab ni Garcia nga patas ug limpyo ang kinatibuk-ang piniliay kini bisan pa sa mga pagduhaduha nga gipatungha sa pipila bahin sa lainlaing mga isyu sama sa overvotes, ug uban pa.
Bisan tuod siya miingon nga ang 2025 eleksyon dili perpekto, ang opisyal nalipay nga sa kinatibuk-an, ang eleksyon gipahigayon nga walay dagkong mga isyu o dagkong mga problema.
Sa pagtapos sa mensahe sa Comelec Chairman sa wala pa ang pormal nga proklamasyon, nagbilin siya og apela sa mga Senador alang sa mga reporma ug kalambuan sa sunod nga piniliay.
