Opisyal nga giila sa Guinness World Records ang nahimo sa managhigala nga sila si Sujoy Kumar Mitra ug Prateek Choraria human nila nabisita ang 42 ka librarya sa tibuok New Delhi sulod lang sa usa ka adlaw.
Nahitabo ang record-breaking nga kalampusan niadtong Disyembre 10, 2025. Sumala sa mga report, dili sayon ang hagit. Kinahanglan nga mogugol ang duha og 60 ka adlaw sa pagplano ug pagkuha lang og mga permit. Lahi kini sa ubang mga rekord diin makapalit ka lang og tiket; sa mga librarya, kinahanglan silang mokontak sa mga librarian, mosumite og mga request letter, ug mokuha og security clearance sa dili pa tugotan nga mosulod ug magrekord sa ilang pagbisita.
Kini ang ikaduhang pagsulay nila ni Mitra ug Choraria sa pagrekord. Niadtong Abril 2025, misulay sila sa pagbisita sa 61 ka librarya apan napakyas sa pag-verify tungod sa wala pagsunod sa estrikto nga opisyal nga mga giya. Dili bag-o si Mitra sa natad sa world record; Usa siya ka mahiligon sa pagbiyahe nga nakabisita na sa tanang nasud sa United Nations ug karon adunay 14 ka titulo sa Guinness, lakip ang pinakapaspas nga oras sa pagbisita sa Seven Wonders of the World sulod lang sa lima ka adlaw.
Bisan pa sa kalisod sa pagdagan ug pagsakay sa pampublikong transportasyon sa tibuok adlaw, determinado ang duha nga tapuson ang hagit. Ang ilang tumong dili lang alang sa titulo, apan aron maedukar ang publiko bahin sa bahandi sa kahibalo o “bangko sa kahibalo” sa ilang lungsod. Gusto usab ni Mitra nga kini magsilbing ehemplo sa iyang 8 anyos nga anak nga babaye nga si Rahyl ug uban pang mga batan-on, nga malingaw sa pagbasa og mga pisikal nga libro sa mga lokal nga librarya imbes nga magsalig lang sa impormasyon gikan sa internet.
