KALIBO, Aklan — Miduyog ang Malay-Boracay Tourism Office sa Department of Tourism (DOT) sa pagsaulog niini sa National Tour Guides’ Day aron ilhon ang importanteng papel sa mga tour guide sa pagpasiugda sa turismo sa Pilipinas ug kulturang Pilipino.
Matud pa ni Kathrine Licerio, tigpamaba sa Malay-Boracay Tourism Office, ang DOT-Region 6 midayeg sa mga tour guide sa ilang serbisyo ug sakripisyo isip cultural ambassadors sa nasud, diin ilang gisaysay ang kasaysayan sa Pilipinas uban ang gugma ug ingon man pagpakita sa tinuod nga kinaiya sa katawhang Pilipino.
Namatikdan nga ang National Tour Guides’ Day gisaulog matag ikatulo nga Lunes sa Hunyo, pinaagi sa Proclamation No. 574, isip pag-ila sa mga kontribusyon sa mga lisensyadong tour guide.
Atol sa selebrasyon, gipasalig ni Tourism Secretary Christina Garcia Frasco nga magpadayon sila sa paghatag og suporta sa mga programa alang sa pagbansay-bansay, panginabuhian, ug propesyonal nga pagpalambo sa mga tour guide, isip kabahin sa tumong sa DOT nga himoong haligi sa ekonomiya ang turismo.
