SARANGANI – Nanawagan si Mayor Salway Sumbo Jr. sa Malapatan Sarangani Province sa katawhan nga undangon na ang pagkaon sa karning iro, tungod kay kini dili luwas kan-on ug bawal na sa balaod.
Matod ni Mayor Sumbo, ang pagkaon sa karning iro posibleng makahatag og dakong kadaut sa kahimsog sa tawo, sama sa rabies ug ubang sakit nga makuha gikan sa hayop.
Iyang gipahinumduman ang tanan nga kini giingong bawal na sukad pa sa tuig 1998 ubos sa Republic Act No. 8485 o Animal Welfare Act of 1998, nga nagpanalipod sa katungod ug kaayohan sa mga hayop.
Napakusgan pa kini nga balaod sa Republic Act No. 10631 niadtong 2013, nga nagtakda sa mas hugot nga silot alang sa mga tawo nga masakpan nga nagkatay, nagbaligya, o nagakaon og karning iro.
Lakip sa mga silot mao ang dakong multa ug posibilidad sa pagkabilanggo, depende sa kabug-at sa kalapasan.
Gidani usab sa mayor ang mga residente sa pagpakita og responsableng pag-atiman sa mga hayop, ug sa pagreport dayon sa mga awtoridad kung adunay makitang ilegal nga pagpamatay o pagbaligya og iro sa ilang komunidad
