GENERAL SANTOS CITY – Gikalipay sa mga staff sa Saint Elizabeth Hospital ang paggawas sa ospital ni Malapatan Mayor Exodus Sumbo human kini maayo sa COVID 19.
Nagpa-admit sa ospital ang amahan sa Malapatan human makasinati ug sintomas.
Gi-angkon ni Mayor Sumbo, nga gikuyawan siya dihang mi-grabe ang iyahang sitwasyon sa ospital.
Human magpositibo sa RT-PCR test, gikulbaan si Mayor Sumbo nga basig dili na niya makitang buhi pa ang iyang pamilya.
Giangkon usab ni Mayor Sumbo nga dili siya motu-o sa una sa COVID 19 apan nagbag-o ang tanan dihang siya na mismo ang na-admit sa ospital.
Miapela ang nasampit sa publiko nga dili angayang balewala-on ang Covid-19.
Nasayran nga 23 ka adlaw sa ospital si Mayor Sumbo ug tulo ka-adlaw siya nga kritikal human nga gi-intubate sa iyahang mga doktor.
Pero gidayeg ni Dr. Peter Tabar, ang usa sa attending physician sa opsiyal, nga dakong tabang ang maisugong pagsagubang ni Mayor Sumbo sa virus.
Nagpasalamat ug mi-saludo ang nahisgutan sa tanang mga frontliners nga nag-atiman sa mga pareha niya nga mga Covid-19 patient.
Alang kang Mayor Sumbo, ikaduhang kinabuhi na niini og makalingkawas sa maong virus kung mosunod sa mga tambag sa mga doktor ug matuo sa mga quarantine protocol nga gipatuman sa gobyerno ug dili kalimtan ang pagsalig sa Diyos.
