Nagtuo ang Malacañang nga wala’y angay kabalak-an sa kahimsog ni kanhi Presidente Rodrigo Duterte, bisan pa sa mga taho sa iyang pamilya nga grabe ang pagniwang niini samtang naa sa The Hague.
Matod ni Palace Press Officer Claire Castro, base sa pamahayag sa kanhi asawa ni Duterte nga si Elizabeth Zimmerman, bisan og niniwang siya, morag naa siya sa maayong kondisyon.
Labi na kay ang kanhi Presidente mismo niingon nga “okay” na siya ug wala na siya moinom og maintenance nga tambal.
Si Vice President Sara Duterte niingon usab nga anaa sa maayong kahimtang ang iyang amahan.
Gipasalig sa Palasyo nga gihatagan og igong medikal nga pag-atiman si Duterte samtang anaa sa The Hague ug dili kini pasagdan samtang mag-atubang sa iyang kaso sa International Criminal Court.
Dugang pa ni Castro nga posible kinahanglan lamang ug ehersisyo ang kanhi Presidente.
