Gipahibalo sa Malacañang nga wala pa silay makumpirmang impormasyon may kalabotan sa giingong plano nga destabilisasyon batok sa gobyerno sa umaabot nga Hunyo 12, 2026, dungan sa pagsaulog sa Araw ng Kalayaan.
Sumala ni Usec. Claire Castro, dili na kini bag-o nga mga report kay dugay na matod pa adunay mga grupo nga misulay pagbutang sa ilang kaugalingong lider sa gahom bisan pa sa wala pa ang eleksyon sa 2028.
Mipahimangno usab si Castro sa publiko nga mag-amping ug magbantay batok sa iyang gitawag nga “kampon ng kadiliman” nga posibleng magpahinabo og kagubot.
Gipasiugda sa opisyal nga sakop na sa mandato sa mga ahensya sa pagpatuman sa balaod ug mga investigating bodies ang pag-imbestiga ug paghimo sa angay nga aksyon batok sa bisan unsang ilegal nga lihok nga naghulga sa seguridad sa nasud.
