Nipasalig ang Malacañang og dinaliang tabang alang sa atong mga katagilungsod nga grabeng naapektuhan sa 6.9 magnitude nga linog sa Sugbo.
Matod ni Presidential Communications Office (PCO) Secretary Dave Gomez, ang Department of Budget of Management (DBM) adunay standby calamity fund gikan sa National Disaster Risk Reduction Fund.
Matud usab ni Gomez nga nagpadayon ang assessment sa kadaot sa mga dapit nga naigo sa kusog kaayong linog.
Wala pa makasulti si Gomez kon pila ang pondo nga ipagawas sa DBM. Apan matod sa DBM, aduna pay P8 bilyon nga standby fund alang sa quick response effort sa gobyerno.
Dugang pa sa Kalihim nga gisiguro usab ni Presidente Ferdinand Marcos Jr. nga mahatagan dayon og hinabang ang mga katagilungsod sa Sugbo.
Sa pagkakaron, ang tanang resources sa gobyerno gipalihok na usab sa Presidente.
Gipasalig ni Secretary Gomez nga mahatagan ug tabang ang mga apektadong local government units (LGUs).
Gipatuman usab sa DTI ang price freeze sa mga nag-unang pagkaon ug gasolina.
Samtang gihimo sa Department of Energy (DOE) ang tanan aron mahibalik ang kuryente sa lugar.
Gipakatap usab ang PNP aron mamintinar ang kalinaw ug kahapsay aron malikayan ang pagpangawat.
Gikatakdang mobisita sa ground zero ugmang adlawa si Presidente Ferdinand Marcos Jr.
