Gipasiguro sa Palasyo ngadto kang Vice President Sara Duterte nga dili gamiton sa administrasyong Marcos ang Philippine National Police o PNP isip instrumento aron pasakitan siya o ang iyang mga tagasuporta.
Mao kini ang pahayag sa Presidential Communications Office human miingon si Duterte nga nabalaka siya alang sa iyang kinabuhi ug wala siya’y pagsalig sa kapulisan, korte ug bisan sa security team nga gitudlo alang sa iyang seguridad.
Matod ni Palace Press Officer Claire Castro, dili tugotan sa administrasyon nga gamiton ang PNP sa bisan unsang matang sa kapintasan.
Dugang pa sa PCO nga gituman lamang sa PNP ang mandato niini subay sa balaod, nga walay pagpihig o konsiderasyong politikal, ug alang sa kaayohan sa tanang Pilipino.
Gipahayag usab sa Palasyo ang pagsalig niini sa liderato ug kapin 230,000 ka mga personnel sa PNP nga, matod pa niini, padayon nga propesyonal sa pagpanalipod sa mga katungod sa mga tawo nga anaa sa ilang pag-atiman.
Gihangyo usab sa administrasyon si Duterte nga iduso pinaagi sa legal nga mga pamaagi ang bisan unsang reklamo o kabalaka bahin sa mga lihok sa kapulisan, imbis nga magpagawas og mga alegasyong walay lig-on nga basihan.
Nagpahayag usab og kasiguruhan si PNP Chief Gen. Jose Melencio Nartatez Jr. nga tagdon sa kapulisan ang mga kabalaka ni Duterte bahin sa iyang seguridad.
Gimandoan na ang mga hingtungdan nga police units nga padayon nga magmonitor ug maghimo og threat assessment batok sa bise presidente ug sa iyang immediate family.
Bisan pa niini, miingon ang PNP nga hangtod karon wala pa kini makakita og beripikadong hulga batok kang Duterte o sa iyang pamilya.
Nagsugod ang kabalaka ni Duterte bahin sa iyang seguridad human migawas ang arrest warrant batok kaniya tungod sa tulo ka kaso sa grave threats batok kang Pangulong Ferdinand Marcos Jr., First Lady Liza Araneta-Marcos ug kanhi House Speaker Martin Romualdez.
Nagpiyansa si Duterte og P366,000 sa Quezon City Regional Trial Court niadtong Sabado.
Naggikan ang kaso sa iyang online press conference diin iyang giingon nga nakigsulti siya sa usa ka tawo aron ipapatay sila PBBM,First Lady Marcos ug Romualdez kung siya mismo ang mapatay.
Sa wala pa siya misulod sa korte, miingon si Duterte nga wala siya’y pagsalig sa kapulisan ug nahadlok siya alang sa iyang kinabuhi ug sa iyang pamilya.
Samtang, ang PNP nahimong pangunang tigpatuman sa kampanya batok ilegal nga droga panahon sa administrasyon sa iyang amahan nga si kanhing Pangulong Rodrigo Duterte, diin linibo ka mga gituohang drug suspects ang namatay.
Sa mga imbestigasyon sa National Bureau of Investigation o NBI ug Commission on Human Rights o CHR, natino usab nga adunay pipila ka mga pulis nga giingong nalambigit sa pagmaniobra sa crime scenes ug pagbutang og ebidensiya aron mapugngan ang imbestigasyon sa pipila ka mga kaso sa pagpatay.
