Gipasalig sa Malacañang nga mas estrikto ang kagamhanan sa pagsulod og mga bag-ong kontrata may kalabotan sa flood control projects, ilabina batok sa mga kompaniya nga napakyas sa paghuman sa ilang nangaging mga proyekto.
Kini maoy gipahibalo ni Palace Press Officer ug Presidential Communications Office (PCO) Usec. Claire Castro nunot sa direktiba ni Presidente Ferdinand Marcos Jr.
Matod ni Castro nga klaro ang pamahayag sa PBBM nga bantayan pag-ayo ang mga kompanya nga adunay dili maayong mga rekord, apil na ang pipila nga na-blacklist kaniadto apan nag-ilis lang sa ilang ngalan ug nakakuha pa og mga proyekto gikan sa gobyerno.
Gihingusgan ni Castro nga importante ang kooperasyon sa media ug publiko aron mailhan ug masusi ang maong mga kompanya.
Dugang ni Castro nga mas maayo nga tan-awon usab sa mga tigbalita ang kalidad sa trabaho ug kasaysayan o record sa mga kontraktor aron masiguro nga hapsay ang pagpatuman sa mga proyekto.
