GENERAL SANTOS CITY – Gikumpirma sa Philippine Drug Enforcement Agency (PDEA)-Region 12 nga usa ka major supplier sa marijuana sa Tampakan, South Cotabato, ang nasikop nga mag-uuma miaging adlawa sa natigayong buy-bust operation Purok 17, Barangay Mabuhay ning siyudad.
Kahinumduman nga napalitan ug usa ka rolyo sa marijuana ang nagpangalan ug Alfonso Malayon Gulae, 35-anyos, taga-Brgy Danlag sa Tampakan, sa kantidad nga P1,000.
Gawas niini, narekober usab sa iyang posisyon ang usa ka kilo sa marijuana nga may estimated street value nga P34,000.
Nasayran nga ang suspek usa usab ka coordinator sa B’laan tribe sa ilang lugar.
Matud ni Kath Abad, tigpamaba sa PDEA-12, gikonsiderang high value target si Gulae gumikan gilapdon sa iyang kalambigitan sa aktibidad sa iligal nga droga, ug dugay nang gipailawom sa surveillance operations.
Kasong pagsupak sa Sections 5 ug 11 sa RA 9165 kon Comprehensive Dangerous Drugs Act of 2002 ang gipasang-at sa maong dinakpan.
