Usa na usab ka init nga hisgutanan ang kahimtang sa relasyon nila ni Maine Mendoza ug Arjo Atayde sa social media.
Kini human namatikdan sa mga netizen nga wala ang “Dubsmash Queen ‘ host sa usa ka importanteng panagtapok sa pamilyang Atayde.
Nagsugod ang espekulasyon human ang komedyante nga si Bayani Agbayani nag-post og video sa TikTok (nga gipanas na) nga nagpakita sa selebrasyon sa adlawng natawhan ni Ria Atayde ug sa iyang amahan nga si Art Atayde.
Sa maong video, makita nga kompleto ang pamilyang Atayde apan mamatikdan nga wala si Maine.
Tungod niini, adunay mga netizen nga nag-link sa magtiayon sa viral blind item bahin sa sikat nga “power couple” nga giingong nagbuwag.
Dali nga nanalipod ang pipila ka mga tigpaluyo sa ArMaine.
Sumala nila, ang pagkawala ni Maine sa usa ka okasyon dili igo nga basehan aron moingon nga natapos na ang iyang relasyon kang Arjo.
Sa pagkakaron, wala pa’y gihimong bisan unsang pahayag ang kampo nila ni Maine ug Arjo aron kumpirmahon o ihimakak ang nagkaylap nga espekulasyon.
Kahinumduman nga ang duha gikasal niadtong Hulyo 2023 sa usa ka intimate nga seremonyas sa Baguio City.
