DAVAO REGION– Nagbangutan karon ang mga nahibiling kabanay sa usa ka magtutudlo nga namatay human sumala pa na-stress kini gumikan sa kasaba nga nadawat gikan sa principal.
Giila ang maong biktima nga si Marjorie Espinosa Llanto Boldo, usa ka magtutudlo sa Davao de Oro.
Base sa gi-post sa pag-umangkon sa biktima nga screenshots gikan sa groupchat sa maong magtutudlo ug mga inahan, nakasab-an sumala pa si Maam Marjorie gumikan adunay usa ka ginikanang midiretso pagsumbong ngadto sa principal inay nga moduol kaniya.
Kini sumala pa human nga adunay insidenteng nahitabo sulod sa classroom diin ang anak sa maong mireklamo nagkadugo ang ulo, human nga naigo sa bangko ang ulo sa bata gumikan sa pagsayawsayaw niini nga pinahigda.
Mabasa sa maong chat sa magtutudlo nga una na niyang gibadlong ang mga bata nga dili magdagan-dagan og basin musantop sa disgrasya.
Gani mihangyo pa ang maong magtutudlo ngadto sa mga ginikanan nga og adunay concern i-agi una kaniya aron kini maistoryahan.
Dugang pa sa maong magtutudlo nga sulod sa hataas nga panahon nga nahimo kining maestra, karon ra matud pa sya nainsulto pag-ayo sa principal.
Sumala pa sa naasoy nga maestra, nga gikwestyon matod pa ang iyahang pagkamaestra, diin karun lamang sumala pa kini niya nasinatian sulod sa kapin 30 na katuig niyang nahimong magtutudlo.
Gani, human sa pagpagawas niini sa gibati ngadto sa mga ginikanan, nagkanayon pa kini nga kalimtan na lamang ang panghitabo og mag move-on na lamang sila.
Apan human ang pila ka semana, nakutluan ang maong magtutudlo sa kinabuhi.
Sa pagkakaron, gihaya na ang patay nga lawas sa maong magtutudlo samtang wala pa usab nagpagawas og pamahayag ang eskwelahang gitudluan niini.
