Isip ganti sa taas nga tuig nga kaminyuon, giaprobahan sa Sangguniang Panlalawigan sa Nueva Vizcaya ang ordinansa nga mohatag og P50,000 sa mga kababayan niini nga 50 ka tuig nang minyo.
Nalatid sa Ordinance 2024-248 o ang “Nueva Vizcaya Enduring Devotion Award Ordinance,” nga gawas sa P50,000, ang magtiayon hatagan ug plaque of recognition ug letter of felicitation gikan sa ilang gobernador.
Aduna usab silay libreng regular nga medical check-up sa bisan asang medical facility nga gipanag-iya o gidumala sa Provincial Government.
Gipahayag sa ordinansa, ang Sangguniang Panlalawigan adunay taas nga pagtamod sa mauswagon nga mga kaminyuon ug nag-ila sa mga magtiayong Novo Vizcayano nga nakabarog sa pagsulay sa panahon ug nagsaulog sa ilang ika-50 nga Anibersaryo sa Kasal, aron magsilbi nga hagit alang sa umaabot nga mga henerasyon.
Ang Provincial Social Welfare Development Officer maoy mosusi sa mga magtiayon nga mahimong makabenepisyo sa maong ordinansa.
Ang mga aplikante kinahanglan nga mosumite sa mosunod nga mga kinahanglanon:
-PSA nga kopya sa ilang marriage certificate
-Barangay Council Resolution
-Barangay Certificate of Residency
-One valid government-issued ID
-Birth Certificate of each celebrant from the PSA or Local Registry
-Notarized Certificate of Undertaking nga walay pending cases sa annulment
-NBI Clearance
Samtang ang mga kondisyon aron makuha ang mga benepisyo:
-Legal nga minyo sulod sa 50 ka tuig o kapin
-Ang bana ug asawa kinahanglang magkinabuhi sumala sa kaepektibo sa ordinansa ug sa panahon sa pagsumite sa mga kinahanglanon
-Walay rekord o reklamo nga adunay kombiksyon sa pag-abuso sa panimalay ug/o pag-abuso subay sa RA 9262 o Anti-Violence against Women and their Children Act ubos sa pagpresenta sa NBI clearance
-Ang magtiayon nagpuyo sa Nueva Vizcaya sulod sa dili moubos sa 10 ka tuig sa panahon sa ilang ika-50 nga anibersaryo.
Gipahibalo usab sa ordinansa nga ang institutionalization ug suporta sa family strengthening and moral recovery programs nga gipatuman sa Social Welfare office ug uban pang ahensya ang gitumong sa pagpalig-on sa pamilya ug pagsiguro nga ang mga magtiayon makaabot ug molapas pa sa ilang ika-50 ka tuig nga kaminyoon.
