GENERAL SANTOS CITY – Gibutyag ni Leah Tolimao, labaw sa Human Resource Management and Development Office kon HRMDO sa lokal nga panggamhanan sa dakbayan, nga may travel package nga ihatag ang LGU-GenSan ngadto sa mga magretiro nga mga empleyado, isip token of appreciation.
Sumala pa nga ang makaangkon sa maong benepisyo mao kadtong nagpahigayon ug mandatory retirement nga 65 anyos.
Dugang pa ni Tolimao nga 22 ang lakip sa maong benepisyo apan sa gipahigayon nga medical examination, 11 lamang ang nakapasa ug usa niini si Federico Cabanit, ang labaw sa accounting office.
Kagahapong adlawa, atul sa flag ceremony, may gipahigayon nga tribute alang kang Cabanit nga kapin sa 30 ka tuig na sa serbisyo.
Gihatagan usab ug higayon nga mamulong si Cabanit, kung asa gisaysay niini ang mapait nga kasinatian nga todo ang pagpaningkamot hangtod nga nakaangkon og haruhay nga kinabuhi.
Sa karon gipaningkamutan matud pa nila nga maproseson ug mahinayon ang giktakdang biyahe sa mga retiree lakip si Cabanit, paingon sa Japan.
Gumikan sa pagretiro ni Cabanit, hulipan siya ni Paulina Goyagoy, ang assistant head sa ilang buhatan.
