Usa ka kusog nga magnitude 7.4 nga linog ang miigo sa baybayon sa estado sa Chiapas, Mexico, hinungdan nga nagpagawas og tsunami warning ang mga otoridad ug nabati usab ang pag-uyog sa Guatemala ug El Salvador.
Matud sa United States Geological Survey o USGS, ang linog miigo duol sa lungsod sa Puerto Madero sa Chiapas ug may giladmon nga gibana-bana nga 10 kilometro.
Human sa linog, nagpagawas og pahimangno ang U.S. Tsunami Warning System tungod sa posibleng pag-abot sa tsunami waves sa mga baybayon sulod sa 300 kilometro gikan sa sentro sa linog.
Sa Guatemala City, kusog nga nabati ang pag-uyog nga hinungdan nga adunay mga residente nga migawas sa ilang mga balay aron malikayan ang posibleng peligro. Misunod usab ang evacuation sa mga empleyado sa usa ka building sa gobyerno isip kabahin sa safety protocols.
Nabati usab ang linog sa El Salvador, ilabi na sa kaulohan niini, hinuon wala pay report sa dakong kadaot o adunay namatay.
Padayon karon nga ginabantayan sa mga awtoridad ang kahimtang ug gihimo ang assessment aron matino ang posibleng epekto sa kusog nga linog.
