Dili moubos sa 37 ka tawo ang nasamdan human miigo ang magnitude 5.9 nga linog sa eastern Japan niadtong Domingo, nga kusog usab nga nabati sa Tokyo.
Sumala sa Japan Meteorological Agency, adunay giladmon nga 70 kilometro ang linog ug nahimutang ang sentro niini sa habagatang bahin sa Ibaraki Prefecture.
Kadaghanan sa mga nasamdan natumba o naigo sa mga muwebles ug pultahan human kalit nga nakamata ug nakulbaan tungod sa paglinog.
Sa kinatibuk-an, 15 ang nasamdan sa Tokyo, siyam sa Saitama, walo sa Kanagawa, upat sa Chiba ug usa sa Ibaraki.
Usa usab ka babayeng anaa sa edad 80 ang grabeng nasamdan sa bat-ang human mahulog gikan sa higdaanan sa Yokohama.
Nakaapekto usab ang linog sa pipila ka serbisyo sa express ug local trains paingon sa Tokyo ug Narita Airport, apan normal ang operasyon sa Shinkansen bullet trains.
Nag-deploy na usab og task force ang mga otoridad aron susihon ang posibleng kadaot tungod sa linog. Nagpasidaan usab ang Japan Meteorological Agency nga posible pa ang sunod-sunod nga paglinog sa mosunod nga mga semana.
Wala hinuoy gihimong tsunami warning ug wala usab naiulat nga problema sa kapin usa ka dosena ka nuclear power plants sa nasud.
Usa ka underground water pipe sa Koto district sa Tokyo ang nadaot tungod sa linog apan daling naayo.
