GENERAL SANTOS CITY – Unom ka hinay nga aftershocks ang sunud-sunod nga natala sa Maasim, Sarangani Province, human ang 5.2 magnitude nga linog nga mitay-og sa lugar kagabii, atul sa bisperas sa Bag-ong Tuig.
Base sa report sa Philippine Institute of Volcanology and Seismology o PhiVolcS, labing ulahi ang natala nga 2.2 magnitude, ala-1:16 kaganihang kaadlawon.
Kahibaluan nga dungan sa nasampit nga linog kagabii, nasinatian usab ang intensity 4 nga pagtay-og dinhi sa General Santos City; Lake Sebu, South Cotabato, ug Alabel, Sarangani.
Intensity 3 usab ang nasinatian sa Davao City ug Lebak, Sultan Kudarat. Samtang intensity 2 sa Zamboanga City; Tupi ug Sto. Niño, South Cotabato, ug Koronadal City.
Una niini, base sa report gikan sa Phivolcs, natala ang sentro sa nasampit nga 5.2 magnitude nga linog sa 48 kilometers sa habagatang-kasadpang bahin sa Maasim, Sarangani, sa gilawmon nga dos kilometro ug tectonic in origin.
Hinuon walay natala nga kadaot tungod sa linog, ug wala usay gipagawas nga tsunami alert.
