SARANGANI – Patay ang usa ka nagpangalang Ruel Talunod Tundag, 52 anyos, minyo, mag-uuma, ug residente sa Sitio Crossing Coronado, Barangay Malalag Cogon, Malungon, Sarangani Province human kini gitigbas sa suspek nga si Ridgym Tioga Avila, 49 anyos, minyo, farm caretaker ug residente usab sa nasampit nga lugar.
Sumala sa taho sa Malungon MPS, alas 5:00 sa hapon ang takna kagahapong adlawa dihang nakadawat og tawag ang ilang buhatan pinaagi ni William Baculna, Purok Chairman sa Barangay Malalag Cogon, Malungon ug gipahibalo nga adunay nahitabong pagpanigbas sa Sitio Crossing Coronado.
Base sa report, gilayon nga nagresponde ang patrol alert team sa nasangpit nga lugar sa pagpanguna ni PSMS Cirilo G Alfeche ug sa duty investigator.
Usa ka lalaki ang kalit nga mitungha sa nahisgutang estasyonan nga gustong mo-surrender nga nalambigit sa nasangpit nga insidente. Pag-abot sa responding team sa nahisgutang lugar nagbuy-od ang wala nay kinabuhi biktima nga nakaangkon og mga samad tinigbasan sa nagkadaiyang parte sa kalawasan hinungdan sa iyang hinanaling kamatayon.
Sumala sa imbestigasyon nga gihimo, mga alas 3:50 sa hapon kagahapon, samtang ang biktima padulong sa iyang uma, sakay sa iyang HONDA XRM 125 nga motorsiklo nga may plakang 1101-373677, gibabagan sa suspek ang iyang dalan nga maoy hinungdan sa dili pagsinabtanay sa duha nga miresulta sa pagpanigbas.
Misulay pa pagdagan ang biktima apan gigukod siya sa suspek nga mitigbas kaniya kung asa naigo sa walang bahin sa buko-buko, dughan, tuong bukton, ug kamot ug nahagba sa yuta.
Gidala ang biktima sa Sarangani Provincial Hospital Malungon aron matambalan apan gideklara kini nga dead on arrival sa attending physician.
Sa pagkakarun, nakakustodiya na sa Malungon MPS ang suspek alang sa tukmang dokumentasyon ug disposisyon.
