SARANGANI- Patay ang usa ka mag-uuma human kini gipusil ug dayon gitigbas sa iyang kaugalingong bilas nga usa ka tanod sa Sitio Bulat, Barangay Upper Suyan, Malapatan, Sarangani Province.
Sumala sa nakuhang impormasyon, nagsugod ang panagbangi sa magbilas human gipintik sa biktima ang balay sa pukyutan, nga misangpot sa pagpaak sa suspetsado.
Tungod sa grabeng kalagot, gikuha sa suspetsado ang iyang pusil nga de-dose ug gipusil ang biktima sa tiyan, nga nagresulta sa iyang pagkamatay.
Apan wala pa matagbaw ang suspetsado, gikuha usab niya ang bolo ug dayon gitigbas ang lawas sa biktima, hinungdan nga halos dili na ma-ila ang panagway niini, lakip na ang ubang bahin sa kalawasan.
Narespondehan dayon kini sa 73rd IB Alpha Company, diin dali nga nadakpan ang suspetsado ug gidala sa kapulisan sa Malapatan.
Padayon ang imbestigasyon sa kapulisan, samtang gihan-ay na ang mga dokumento ug ebidensya alang sa pormal nga pagsaka sa kaso batok sa responsable.
