GENERAL SANTOS CITY- Patay ang usa ka tres anyos ug duha ka bulan nga mga bata human nabanggaan sa usa ka motorsiklo ang mag-inahan nga mitabok sa dalan sa national highway Brgy Baluan ning dakbayan.
Giila ang mga namatay nga silang Sabrina Oregano, tres anyos nga gideklarang dead on arrival sa balay-tambalanan, ug Zaira Oregano, duha ka bulan, nga matud pa nakabsan usab sa kinabuhi sa ospital, human ang nasampit nga aksidente.
Giila ang ilang inahan nga si Reina Lahira, 34 anyos, residente sa Brgy Baluan ning dakbayan, nga nagpabilin pa sa pribadong balay-tambalanan gumikan sa naangkon nga mga bali ug samad sa lawas.
Nasayran nga natigayon ang insidente pasado alas-6:00 kagabii, kung asa lakip ang mga sakay sa motorsiklo nga giilang si Elmark Fernandez, 30, ang driver, ug Joy M Sandoy, 26 anyos, ang backrider, nga pulos usab angol human sa insidente.
Gikabutyag nga igo lamang mitabok sa highway ang inahan samtang gikugos ang duha ka bulan nga anak, kauban usab ang tres anyos, dihang kalit nabanggaan sa naka-motorsiklo.
Gidala na sa punerarya ang patay’ng lawas sa duha ka bata, samtang nagpadayon ang imbestigasyon sa insidente.
