GENERAL SANTOS CITY – Patay ang mag-asawa nga sakay sa motorsiklo human mabangga sa kasugat nga jeep.
Nahitabo ang aksidente kagahapon sa buntag sa Prk Bombil Extension Brgy Bawing ning dakbayan.
Sa pakighinabi sa Bombo Radyo kang PO3 Meynard Mallo sa Traffic Management Unit-GenSan, giila niini ang mga namatay nga silang Renato ug Beverly Pangkong, taga-Brgy Bawing ning dakbayan.
Sa imbestigasyon, gikan matud pa sa sa GenSan ug padulong sa direksyon sa Maasim, Sarangani Province ang motorsiklo.
Kalit matud pang mibalhin ug lane ang motorsiklo hinungdan nga nabangga ang kasugat nga jeep nga maneho sa usa ka Cirilo Alvarando.
Gikabutyag nga nagwagol pa ang dagan sa motorsiklo dihang kalit mibalhin ug lane. Gituuhan usab nga parehong paspas ang dagan sa duha ka sakyanan.
Kahibaluan nga sa kakusog ug impact, nalagpot ang mag-asawa ug anaa sa 20 metros, hinungdan nga nakaangkon ug grabeng samad sa lawas, nga rason sa ilang kamatayon.
Samtang midiresto gilayon sa TMU-GenSan ang suspek sa jeep human sa aksidente.
