GENERAL SANTOS CITY – Padayong giimbestigahan sa Traffic Management Unit ang natigayon nga maduguong banggaanay sa usa ka starex van ug mirage nga kotse, sa Purok Palen National Highway Barangay Labangal ning siyudad, kung asa duha ang patay.
Kahibaluan nga ang mga biktima sakay sa kotse nga may plate number nga NO 2682, nga mao sila si Francis Paul Rosales, 27 anyos, taga Gensanville Subdivision Bula; ug Bayani Paul Calonzo, 22 anyos, taga-Tiongson St. Lagao, ug maoy nagmaneho sa mirage.
Sa inisyal nga imbestigasyon sa TMU pinaagi ni PO1 Joel Quilindirino, gikan ang Starex sa Makar ug padulong sa sentrong bahin samtang ang Mirage ang padulong sa Makar.
Samtang padayong nagpaalim sa balay-tamblanan ang driver sa van nga si Wilson Carlos Jr, 33 anyos nga taga Brgy City Heights.
Gikabutyag nga posibleng milihis sa dalan ang sakyanan nga Mirage hinungdan sa kagrabe nga impact apan gituki pa ang posibilidad nga nakainom ang mga biktima.
