Nakaplagan nga patay ug walay sinenaang usa ka madre sa sulod sa iyang giabangan nga apartment sa Brgy. San Carlos, Lipa City, Batangas.
Giila ang biktima nga si Sister Rita Rama, 54 anyos, lumad sa Matanao, Davao del Sur, ug temporaryong nagpuyo sa La Mera Vigliosa Apartment sa Adelina Homes.
Nadiskubre ang iyang lawas human bisitahon siya sa iyang suod nga higala, nga nagduda dayon nga dunay dautang nahitabo. Sumala sa testigong higala, nakabantay siya og hugaw nga baho nga nagagikan sa apartment, nga hinungdan aron siya mangayo og tabang sa mga barangay officials human niya makita nga nakasusi nga sirado ang pultahan ug bintana sa lugar.
Pag-abli sa apartment, didto na ilang nasapwan si Sister Rita nga walay kinabuhi, walay bisti ug naghulid sa iyang higdaanan.
Sa inisyal nga imbestigasyon sa Lipa City Police ug Scene of the Crime Operatives (SOCO), nakita ang mga pasa sa lawas sa biktima ug mantsa sa dugo sa pribadong parte sa lawas ug sa bedsheet. Apan, sa resulta sa autopsy, napamatud-an nga myocardial infarction o atake sa kasingkasing ang hinungdan sa kamatayon sa madre.
Giklaro sa kapulisan nga wala’y ebidensiya nga adunay foul play o sexual assault, ug nagpabiling intact ang pribadong parte sa lawas sa biktima.
Padayon ang dokumentasyon sa kaso apan giila kini nga natural death base sa ebidensya ug medikal nga findings.
