GENERAL SANTOS CITY– Anaa na sa mga kamot sa kapulisan ang usa sa mga suspek sa pagpusil patay kang Renante ‘Ren” Tampus, 35 yrs.old, tag-iya sa beauty salon sa Daproza Avenue, Barangay Dadiangas West ning dakbayan sa Gensan.
Gikumpirma ni Police Colonel Nicomedes Olaivar Jr. City Director sa Gensan City Police Office(GSCPO) ang pagkasikop kang alias ‘Troy’ nga sa karon balhog sa Pendatun Police Station.
Ang nadakpang suspek giingong nagsilbi nga look-out sa naasoy nga krimen.
Nadakpan ang nahisgutan sa iyang panimalay mga alas-10:30 ang takna, kagabii (Huwebes), Enero 16.
Sa imbestigasyon sa kapulisan, nasayran nga tulo ka mga suspek ang gikonsidera nga responsable sa krimen.
Nanawagan ang GSCPO sa publiko nga makig-alayon sa kapulisan kung adunay mga impormasyon kabahin sa krimen nga makatabang sa padayon pa nga pagpangita sa mga awtoridad sa duha pa ka suspek, ang drayber ug ang gunman nga giilang si Lito Rehang.
Ang giingong gunman ang kabanay matod pa sa karelasyon sa biktima nga giilang si Keid Jomare Esmael.
Kahibaluan nga gipusil patay si Tampus sulod sa iyang salon niadtong January 15, pasado alas 6 sa gabii.
Away sa negosyo sa oil retail sa kasosyo sa biktima ang gitan-aw nga motibo sa krimen.
