GENERAL SANTOS CITY – Nagpatuman og “lockdown” ang Sarangani Province human nagka-outbreak ang katapad nga probinsya sa Davao Occidental tungod sa African Swine Fever (ASF).
Nagresulta kini sa pagkamatay sa kapin 1,000 ka baboy og adunay gireport nga natalang kaso sa Davao del Sur og sa Koronadal City, South Cotabato.
Matud kang Sarangani Governor Steve Chiongbian Solon nga nagpatuman og lockdown og pag-ban sa buhing baboy og karne niini sa mga boundary area sa probinsya aron masiguro nga dili makalusot ang ASF sa Sarangani.
Dugang sa gobernador nga dili tiaw ugaling makasulod ang ASF sa Sarangani tungod sigurado nga makaapekto kini sa mga katawhan nga nahimong panginabuhian na ang pag-atiman og baboy.
Sa pakighinabi sa Bombo Radyo GenSan gibutyag sa usa ka Lady Love Campana, residente sa Malita Davao Occidental nga gipahugtan sa mga otoridad ang pagbantay sa ilang lugar human natala ang kaso sa ASF.
Tungod sa sitwasyon wala nay nagbaligya og karne sa baboy sa mga palengke.
