GENSAN- Gipatin-aw ni Edwin Espejo Commission Member IV sa National Commission of Senior Citizens (NCSC) nga ang hinungdan sa taas nga listahan sa mga senior nga wala pa makadawat sa social pension mao ang limitado nga pundo gikan sa Kongreso nga igo lang alang sa 4.2 million ka benepisyaryo, samtang anaa na sa 5.6 million ang kinatibuk-ang gidaghanon sa mga senior citizens.
Tungod niini, gipamahayag ni Espejo nga magpabilin gyud nga anaa sa waitlist ang daghan pang mga tigulang hangtud nga dili mapadako ang budget o mapatuman ang universal pension nga nagkinahanglan og mokabat sa P150 billion.
Sa laing bahin, naningkamot ang ahensya sa pagpasabot sa mga nagreklamo nga ang pag-apil sa pension program nagdepende sa estrikto nga proseso ug limitasyon sa pundo, ug dili basta-basta makadawat ang tanan bisan og kwalipikado sila.
Kini nga sitwasyon nagpakita sa dakong hagit nga giatubang karon sa gobyerno sa pagbalanse sa mga serbisyo alang sa nagkadaghan nga populasyon sa mga senior citizen sa nasud.
