GENERAL SANTOS CITY – Kasong pagsupak sa RA 9165 kon Comprehensive Dangerous Drugs Act of 2002 ang giatubang sa lima ka drug personalities human masikop sa buy-bust operation.
Natigayon ang operasyon atubangan sa munisipyo, sa Brgy Poblacion, pinaagi sa hiniusang pwersa sa kapulisan sa Police Regional Office 12, Miyerkules sa gabii.
Balhug sa Malapatan Municipal Police Station ang mga dinakpan nga silang Tato Mamalangkas, 29-anyos, taga-Simway, Sultan Kudarat; Nashif Mudas, 22, taga-Sultan Kudarat gihapon; Sabri Salipada, 28, taga-Pigcawayan, Cotabato; Habib Saligan, 21, taga, Sultan Kudarat; ug Jay-Ar Esmael, 18-anyos.
Sakay ang mga nahisgutan sa usa ka SUV dihang miabot sa lugar, kung asa positibo silang napalitan sa pulis nga nagpailang poseur buyer, ug upat ka sachet sa shabu sa kantidad nga P6,000.
Gawas niini, narekober usab sa kapulisan gikan kanila ang laing unom ka sachet sa shabu.
Una niini, nakatransaksyon sila sa kapulisan pinaagi sa social media sa tumong nga i-buy-bust sila sa iligal nga pagbaligya ug armas, apan walay narekober nga armas atul sa operasyon.
