GENERAL SANTOS CITY – Dead on the spot ang driver sa motorsiklo tungod nadasok sa sulod nga bahin human kalit mibangga sa gisundan niining traysikol alas-10:00 kagabii sa Polomolok, South Cotabato.
Giila sa Polomolok Municipal Station ang namatay nga si Joniel Espartero Maramba, 27 anyos, driver sa single motorcycle nga gikonsiderang Vehicle-2 ug residente sa Pioneer St. Brgy. Poblacion, Polomolok.
Samtang, ang nabangga niining Tricycle adunay Plate No. 123009 nga gimaneho usab ni Marlon Niere Quibo, taga People’s Village, Brgy. Cannerry, Polomolok.
Subay sa imbestigasyon sa kapulisan, parehong gilatas sa maong Tricycle ug Motorsiklo ang dalan padulong Cannery pasado alas-9:00 kagabii.
Apan, pag-abot sa Cannery Laundry Hub kalit lang mibangga ang motorsiklo sa lubot sa gisundan nga Tricycle ug tungod sa kakusog sa impact sa maong bangga nadasok ug namumo ang batan-ong driver sa likod nga bahin sa Tricycle ug diha-diha kining namatay.
Anaa na karon sa lokal nga punerarya sa Polomolok ang patay’ng lawas sa biktima ug anaa usab karon sa kustodiya sa PNP-Polomolok ang driver sa Tricycle.
