GENERAL SANTOS CITY – Gipangayo sa mga militanteng grupo sa Soccsksargen ang tubag ni Presidente Ferdinand Marcos Jr. kalabut sa dugang sweldo sa mga mamumuo.
Sa pakighinabi kang Herbert Demos, Regional Director sa SENTRO-Soccsksargen, gibutyag niini nga angayang i-certify ang legislated P100 wage hike nga urgent.
Gipaklaro ni Demos nga dili makiangayon ang kasamtangang minimum nga suholan sa rehiyon tungod dili makaapas sa mga bayrunon sama sa kuryente ug tubig ug uban pang palaliton tungod sa taas nga presyo.
Matod niini nga kung tan-awon ang legislated P100 wage hike ang dili pa paigo ug para sa ilang grupo, angayang P150 ang iusbaw sa suholan.
Ang gipakita nga lihok protesta sa adlaw mismo sa SONA sa Pangulo aron mapaminawan ang ilang mga mulo ug ingon man mahimo silang tingog sa mga ordinaryong lungsuranon.
Gipangayo usab sa maong mga grupo nga mapatuman ang Magna Carta of the Poor Act.
Samtang, imbes nga hatagan og pagtagad ang away sa politika ni Pang. Marcos ug Ex-Pres. Rodrigo Duterte, angayan una nga ipadaplin kini ug pangitaan og solusyon ang mga problema nga giatubang sa nasud.
