GENSAN – Gipakusog karon sa General Santos City Police Office (GSCPO) ang ilang presensya sa mga pampublikong tunghaan sa siyudad subay sa pagsugod sa klase karong Lunes, Hunyo 16, 2025.
Matod ni Police Col. Nicomedes Olaivar Jr. hepe sa GSCPO, nga gilunsad nila ang “Ligtas Balik Eskwela 2025 campaign, nga naglatid sa pagdeploy og mga kapulisan sa mga strategic nga eskwelahan aron masiguro ang kahusay ug kaluwasan sa mga estudyante, ginikanan, ug magtutudlo.
Lakip sa ilang gibantayan mao ang paglikay sa mga insidente sa pagpanghilabot, snatching, ug traffic congestion labi na sa mga tunghaan nga naa sa city proper susama sa General Santos City High School ug Bula National High School.
Gipasalig sa GSCPO nga magpadayon ang ilang suporta hangtod masiguro nga hapsay ang tanang lakang sa pagsugod sa klase sa tibuok siyudad.
