GENERAL SANTOS CITY – Nakumpiska sa puwersa sa gobyerno ang mga tag-as nga kalibre sa armas dungan sa pag-aresto sa usa ka iladong lider sa bandidong grupo sa Bagumbayan, Sultan Kudarat.
Nagpahigayon og raid ang hiniusang pwersa sa Charlie Company sa 33rd Infantry Battalion sa pagpanguna ni Capt. Rogelio Agustin Jr. og Special Reaction Platoon nga gipangunahan usab ni 1st Lt. Glenn Neil Ambojnon sa Sitio Sapale, Bgy Kabulanan, Bagumbayan.
Giubanan sa duha ka grupo ang mga pulis og SAF troopers gikan sa Senator Ninoy Aquino og Bagumbayan sa pag-implementa sa warrant batok sa nagpangalan og Dodong Baylon.
Matud kay Capt. Agustin, nag-unang target sa operasyon si Baylon nga giakusahang mipatay sa usa ka Lumad pipila ka tuig na ang nakalabay.
Sa pahayag sa usa ka informant nga gitabangan si Baylon sa usa ka Commander Morix Ending nga lider matud pa sa bandidong grupo.
Mukabat sa 12 ka tag-as nga kalibre sa armas ang nakumpiska sa militar sa hideout ni Commander Morix sa Brgy. Bagumbayan.
Lakip sa mga nakumpiskang armas ang usa ka rocket-propelled grenade, M16A1 Assault Rifle, duha ka M14 Assault Rifle, Cal 30-06 M1903 Springfield, 12 gauge Shotgun, tulo ka M79 Grenade Launcher, og usa ka Cal .38 revolver.
Matud usab kay P/Sr/ Insp. Ace Christian Sularte, hepe sa Senator Ninoy Aquino police station, nakasibat si Baylon dihang arestuhon sa mga otoridad apan nakadawat na sila og mga impormasyon kabahin sa gitaguan niini.
Samtang si Commander Morix usab nakadetine og gipailawom sa inquest proceedings kun asa posibleng mapasakaan siya og kasong illegal possession of firearms og pagtabang sa usa ka kriminal.
