GENERAL SANTOS CITY – Gilayong gipailawom sa custodial debriefing sa General Santos City Police Office (GSCPO) ang upat ka miyembro sa usa ka private armed group, human sa boluntaryong pagsurender sa sabakan sa gobyerno.
Matud ni Police Major Patrich Elma, ang hepe sa Makar Police Station nga pulos sakop sa Mudia Clan nga naka-base sa siyudad ang misurender sa mga otoridad nga silang silang Benjie Mudia, ang gitudlong lider sa grupo; Danny Mudia; Sammy Mudia ug Jerry Mudia.
Gibutyag sa nasangpit nga opisyal nga ang pagsurender sa mga naasoyng private armed group members humang ang pag-awhag kanila ni Datu Fulong Dan Alim, ang Presidente sa Indigenous People Alliance Movement and Regional Advisory Council.
Atol sa pagsurender sa mga nasampit, bitbit sa mga nasangpit nga duha ka units sa pusil nga 9mm pistol ug improvised 5.56mm pistol ug mga buhing bala.
Gikonsidera ni Police Major Elma nga dakong kalampusan kini sa tinguha sa kapulisan nga magpabiling hapsay ug malinawon ang dakbayan bisan nga padayon gihapon silang gamonitor kung aduna pa bay lain nga private armed group nga galihok sa syudad luyo sa bahad sa pandemya.
