Nangayo na og tabang ang mga otoridad sa Ceuta ngadto sa gobyerno sa Spain human sa pag-abot sa liboan ka migrante sa gamay nga teritoryo sa Spain nga nahimutang sa amihanang bahin sa Africa.
Nasayran nga gihangyo sa Ceuta ang Madrid nga magdeklara na og national emergency ug magpadala og mga sundalo aron mapalig-on ang seguridad sa utlanan.
Sa mga video nga nakuha sa Tarajal Beach, makita ang gatusan ka migrante nga kadaghanan mga Moroccan nga mitabok sa breakwater ug midagan sa baybayon ug mga kalsada aron makasulod sa teritoryo sa Spain.
Kadaghanan sa mga misulay og adto sa Spain mga batan-ong lalaki, mga babaye, ug mga bata nga kuyog ang ilang mga pamilya.
Matud ni Ceuta regional government head Juan Jesús Vivas, gikinahanglan ang dugang nga puwersa sa kapulisan ug militar aron mapadayon ang seguridad sa nasud.
Una na usab niyang gipahibalo nga puno na ang mga sentro sa pagdawat og migrante sa Ceuta, diin gatusan na kanila ang napugos og katulog sa mga kalsada.
Misamot na usab ang tensyon sa utlanan sa Spain ug Morocco tungod sa pagdaghan sa mga migrante nga misulay og sulod sa Ceuta, lakip na ang uban nga milangoy aron lamang makaabot sa Spain.
Kahinumduman nga niadtong 2021, kapin 8,000 ka migrante ang nakasulod sa Ceuta sulod lang sa duha ka adlaw sa usa sa pinakadakong krisis sa utlanan tali sa Spain ug Morocco.
