GENSAN– Gipahibalo ni Atty. Jong Gonzales, hepe sa Public Safety Office, nga mas seryoso na karon ang pagpangdakop sa mga kolorum nga traysikol tungod kay mismo si General Santos City Mayor Lorelie G. Pacquiao na ang mitingog ug mipahimangno sa mga drayber.
Gipasabot sa mayor nga kinahanglan adunay prangkisa ang matag drayber kon mamasada sila sa kalsada isip panginabuhian.
Tungod niini, sumala pa ni Atty. Gonzales, nidagsa ang mga aplikante nga nagkuha og requirements ug nagproseso sa ilang mga papeles aron malikayan ang penalidad ug kalisod sa pagpamasada.
Nasayran nga sulod sa usa ka tuig ug walo ka bulan sukad pa niadtong Disyembre 2023, wala pa gani makaabot og 5,000 ang nag-apply alang sa prangkisa.
Apan sukad nga gianunsyo ang hugot nga pagpanakop sa kolorum, walo pa lang ka adlaw ang milabay apan mitaas dayon kini ug niabot sa 600 ang nag-apply.
Base sa pinakabag-ong datos karong Agosto 16, 2025, nisaka na sa 5,700 ang nag-apply alang sa prangkisa sa traysikol sa GenSan. _. Si Atty. Jong Gonzales, labaw sa Public Safety Office.
